Sztyrolistkowo  koniczyna To sie  wydarziło  downo,  dobre  100  lot  tymu.   Były   to  czasy  kiedy   po  miastach   i  wsiach   jeździyły  roztomajnte  tyjatry,  cyrkuśniki   i   inksze  jeszcze  magiki.  Pokazowali  sztuczki,  śpiywali  i  tak  zarobiali  na   życie. Przijechali  tyż  do  Rybnika  na  sianny  torg.  Dużo  tam  było  miyjsca  to  tyż  dużo  ludzi   poradziyło ich   łoglondać. Jedyn  z  tych  cyrkuśników  poradziył  bardzo  głośno  godać  beztóż  łon  zapowiadoł  co  bydzie.  Zapowiedzioł   czarodzieja,  kiery  zaroz  wyloz  z  tyj   budy.  Pokozoł  mały piniondz  a  za  chwila  już  go  wyciongo  jednymu  chopu  zza   ucha.   To  zaś   z  rynkowa  zaczon  wytrzonsać  całe  hołdy  sznuptychli. Ludziska   się  prziglonali,  gymby  łotwiyrali  i  niy  mogli  sie  pokapować  jako  łon  to  robi.   Kwiotki   naroz   wyczarowoł  i  rozdowoł   dziołszkom  i  babom. Ludzie  byli  zahipnotyzowani,  łoczarowani,  tak  im  sie  to podobało. Co  chwila  było  coś  inkszego.  Wyloz  zaś   tyn  co to  zapowiadoł  i  godo  - teroz  się  ludkowie   łobejrzyjcie  jako  to  idzie  wybildować   kokota. Teroz  tyn kokot  pójdzie  po  linie  i  bydzie  smyczył   za  sobom  ruby  balek  drzewa.  Ludzie zaglondajom, kiwiom  głowami ,  że tyż  to tak  idzie   wyćwiczyć  takigo  kokota.  Miyndzy  tymi   ludziami  znodła  sie  szykowno dziołszka ,  tako  frelka  kiero  przechodziyła  łod  strony  Chwalowic  i  zatrzimała  sie  na  torgu.  Trzimała  koszyk  pełny  trowy.  Jak  łona  usłyszała  co  łon  godo  ło  kokocie  to zaczła  głośno  wołać: -   ludzie,  czy   wy  ni  mocie  łoczów  czy co,  zaglondejcie,  dyć  tyn  kokot  idzie  po  rubyj   boli   i  ciongnie  za sobom  ździebło  słomy.  Czy was  łopyntało  abo co.  Ludzie  zaczli  szeptać  i  ruszać  sie  aż  magik  to  zejrzoł  i  zawołoł  ta  frelka  ku  siebie. Łona  zaś  te  same  pedziała.  Wtedy  magik  richtich  jom  zaczarowoł…  Nogle  sie  ij  zdało,  że  musi  przelyź   bez  łogromno  woda  i  zaczła  dżwigać  kiecki   żeby  sie  niy  zamoczyć. Była  lobleczono  po  chłopsku ,  miała  jakla  i  kiecka.    Wody  przibywało  a  łona  coroz   wyżyj  kiecka   dżwigała . Niy  musza  wom  godać  co  było  śmiychu  jak  jom   ludzie  widzieli.  Nosiyły  dziołchy  dugie  szwory,  tóż  niy  zawsze  miały  pod  spodkiym  jeszcze   cosik  łobleczone.  Takij  gańby  narobiył  tej  frelce  tyn  magol,  że  boroka  uciekała  du dom  jak  wiater. Łona  te czary  widziała  bo  miała  przi  sobie  w  tym   koszyku   z  trowom  sztyrolistno  koniczyna  a bezmała  jak  sie  jom  mo  przi  sobie  to  sie   widzi  te  cygaństwa.   Aniela Pynkalka

Wybrane miyjsce Lot tymu sporo pojechoł Gustlik na kole po pynzyjo na poczta. Niż wyjechoł, jego Anka prosiyła go żeby niy piół gorzoły. Łobiecoł , że niy. Tak tyż zrobiół. Przijechoł do dom ale po drodze kupił se dwie flaszki piwa a że pynzyjo jest roz na miesionc to jeszcze flaszka czegoś mocniyjszego. Flaszka skrył a piwo pokozoł. Jedne wypiył , siedzioł i rozmyśloł kaj by sie tak siednyć żeby go Anka niy widziała. Zaroz by mu to skasowała. Wpod mu do łepy pomyślonek. Na tym samym placu synek postawiył se nowo chałupka. Jeszcze niy była skończono ale był już dach. Wzion se halbka do kapsy i wylozł po drabinie na wiyrch. Z jednyj strony był brandgibel to se tam siod i niy było go widać. Som do siebie godoł , że tu je fajne miyjsce i że tu mu żodyn niy wlezie i niy upije mu ani łyka. Tu jest zicher. Toż zicher tam było yny na jakiś czas. Jak sie flaszka zrobiyła pusto chcioł stanyć ale niy szło. Wygramuldoł sie ku tymu murku i wrzeszczy , że chce ślyść. Kieryś ze somsiadów słyszoł jakieś bebłanie i ujrzoł go na dachu. Przilecioł na plac i pado pierona, ratujcie Gustlika , dyć łon spadnie z dachu. Co tu teroz robić, chopy w robocie, baby za słabe a kto by sie łopowożoł wlyź po niygo na dach. Anka pado: - Muszymy jakoś to zrobić , niy bydymy przeca fojermanów wołać. Prziszła somsiadka i zaczła do niygo piyknie godać coby tam siedzioł bo łona mu zaroz pomoże. Usłuchnył. Pogoda zrobiyła sie szpetno, zaczło padać i jak na poczontek listopada już było zima. Gustlik cały mokry umaraszony czekoł na wybawiyni. Mioł szczyńści bo jedyn somsiod prziszoł z roboty trocha pryndzyj i wzion się za akcjo. Kole chałupy stoł taki prowizoryczny rynczny wyciong. Prziwiesiół na lańcuchy kara i wywindowoł jom do góry. Potym po drabinie wyloz na dach a łobsługom wyciongu zajeny się baby. Wraziół Gustlika do kary i pomału zjechoł śnim na dół, bo tyn już na szłapach niy poradziół ustoć. Na drugi dziyń jak prziszoł do siebie to łogromnie żałowoł i wszystkich przeproszoł i som na sia boł zły, że taki boł gupi. No, dobrze , że to sie tak skończyło. Trza prziznać, że pomyslonek żeby tam sie ulokować był nadzwyczajny i nadowołby sie do rejestru najgupszych pomysłów. Wierza, że takich gupolów skoro niy bydzie. Aniela Pynkalka

.....................................................................
Mizeroczka

„Łod tygodnia do tygodnia
coroz bardzi schna i chudna.
Moja staro mizeroczka
Już wyglondo jak ta koczka,
pysk mo chudy, wynyndzniony
no, troszka go tam mo zaokronglony…
Roz mi moja staro mlasła:
-„Ty, wiysz skond byś dostoł masła?
Mosz na wsi ujca zamożnego,
weź torba i jedź do niego.”
Pożyczołech se wielkij torby
Łod naszego somsiada Borby,
no i wio do Porymby
żeby zgłobić coś na zymby.
Ciotka z ujcym doma byli
bardzo piyknie mie przijyni,
ino jak moja torba ujrzeli
to ze strachu aż struchleli:
- „Dobrze synku, że zajrzołeś
ale lichy dzień wybrołeś.
U nos biyda aże piszczy,
widać, że i ciebie niszczy.
Choć trzi krowy doma momy
ale suchy chlyb jodomy,
masła nima łodrobinki
no a syra – ani ślinki.
Mlyko trzeba wloć prosiyńciu
troszka kapnyć tyż cielyńciu…
Wy mie złość sie łobudziła
i siarczyście mnom targnyła.
Jak żech krziknoł na ujca śmiało,
to w całym domostwie aż zagrzmiało.
Kiej wom miylsze som cieluchy
niż przociele głodne brzuchy,
to wom tyn dom zaczaruja
i dobytek wasz zrujnuja.
Namalowołech na ścianie trzi krziżyki
i padołech:
„Maskus Paskus Kubikulion
Manyhitis in fajtulion..”
Ciotka z ujcym wystraszyni
szprongiym skoczyli do siyni.
Chned sie znodli z gomołkami,
masłym, syrym i jajcami.
Torba moja aż pynkała,
a jak mie moja staro ujrzała,
to krziknyła jak na weselisku
i cmuknyła mie po pysku.