Gynia i jeji kwiotki Mało kery Slonzok sie znojdzie, kery by nimioł jaki hobby, czyli po naszymu "ptoka". Nikerzi majom tych "ptokow" nawet  wiyncyj niż jednego. Weźmy na to moj kamrat Stanik howie briwy, kroliki i ku tymu zbiyro znaczki pocztowe. Zaś Richuś chodzi na ryby i zbiyro prozne biksy po piwie. Edek zbiyro puchary w trzech dyscyplinach sportowych. Leon chowie kanarki i inksze ptoki. Tak by szło jeszcze poł dnia wyliczać kto co zbiyro i co robi krom swojigo zawodu. Jo tyż mom pora swojich "ptokow". Jednym śnich jest moja zegrodka, ale ni moga sie rownać ze starszom siostrom od mojij nojmilejszyj, czyli z mojom szwagrowkom Gyniom, kero tyż mo zegrodka, a w nij rostoliczne kwiotki i krzoki. Jak była czynno zawodowo, ni miała czasu zajmować sie zegrodkom, dopiyro na pynzyji chyciyła sie cichtowanio lelujow i rostomajntych inkszych kwiotkow i krzokow, co było jeji marzyniym. W roku 1998 zaczła ze swojij zegrodki wyrywać pyrz, pokrziwy i wrotycz, kery sie tak rozrosnył, że nic wiyncyj niy było widać. Szkoda, że nimom fotografki z tamtyj zegrody, ale widzioł żech jom i nigdy bych niy pomyśloł, że bez pora lot idzie na takim miejscu zrobić istny raj kwiotkowy. W roku 2000 Gynia wlazła do klubu hodowcow lelujow i już w rok niyskorzij zaczła zbiyrać dyplomy na wystawach kwiotkow. Do dnia dzisiejszego rok po roku dostowała nagrody za nojlepsze leluje i kompozycje kwiotkowe. Myśla, że latoś zaś swoji leluje pokoże na jakij wystawie. Trza tu tyż pedzieć, że Gynia wystawiała swoji kwiotki na wystawach miyndzynarodowych, co możecie obejrzeć na przedstawionych dyplomach niżyj. Latośne leluje som jeszcze małe i zacznom kwitnyc dopiyro w lipcu, to tyz mom nadzieja zrobić mocka fotografek i tukej je pokozać. W niydziela 6 czyrwca odwiedziył zech Gynia z aparatym, a że prawie kwitnom u nij rostoliczne irysy (po naszymu "kokoci galoty") to tyż możecie se tukej połoglondać ogrod od nij i te piykne kwiotki. To jest Gynia w swojij kwiotkowyj zegrodce... a tukej niżyj pora "kokocich galotow"... tyn tukej na dole mo miano "wesoło wdowka", bo kożdy mo swoji miano, ale jo yno spamiyntoł tyn jedyn, bo tako operetka żech kiedyś widzioł... Wszystki  irysy, ogrod i dyplomy od Gynie  możecie se Moji Rostomili obejrzeć jak klikniecie na tyn modry irys tukej niżyj: Panorama gyninyj zegrodki zrobione 21-07-2010 Gynia jest niykoronowanom krolowom lelujow,  a kto by niy wierził niych se obejrzi te piykne kwiotki w jeji zegrodce,  styknie otworzić album poniżyj: Utopek